Siglir tar il cuntegn
Inhalt

Svizra Pretschs gists per products d'import

L’iniziativa per pretschs pli gists en Svizra è vegnida inoltrada a Berna – ina iniziativa che vul abolir supplements sin products importads.

Chartuns cun cedels d'iniziativa.
Legenda: L'iniziativa per pretschs pli gists en Svizra è vegnida inoltrada. Keystone

Tenor ils 107'908 iniziants saja la differenza da pretsch tranter la Svizra e l'exteriur mo limitadamain da giustifitgar cun ils custs per paja, infrastructura e tschains. Enstagl fetschian furniturs da l'exteriur abus da lur pussanza e tegnian ad aut ils pretschs en Svizra a moda artifiziala.

En futur na duai la Svizra betg vegnir discriminada

Cun quai che mesiras per evitar quai han pliras giadas fatg naufragi en il parlament, duain quests supplements nuncorrects ussa vegnir abolids cun in'iniziativa dal pievel. L'iniziativa duai sfurzar la Confederaziun da rinforzar la lescha davart ils cartels. Interpresas svizras e da l'exteriur duain ins pudair accusar en cas ch'i cunterfan a quella. Plinavant duai in artitgel en la Constituziun fixar ch'ils Svizzers na vegnan er betg discriminads tar il commerzi online. Betg pertutgads da l'iniziativa èn products agrars.

In'allianza largia

Lantschà l'iniziativa han la fundaziun per protecziun da consuments Gastrosuisse e l'uniun d'economia Swissmechanic. Ed en il comité d'iniziativa sa chattan politichers da tut las partidas.

RR novitads 16:00