Siglir tar il cuntegn

Header

Isabelle Moret.
Legenda: Isabelle Moret (PLD) sa legra da sia elecziun sco presidenta dal Cussegl naziunal. Keystone
cuntegn

Presidenta cussegl naziunal Isabelle Moret è la pli auta Svizra

Il parlament svizzer ha elegì la cussegliera naziunala dal chantun Vad Isabelle Moret sco la pli auta Svizra.

Moret è dapi 13 onns cussegliera naziunala. La fin 2006 è la dunna da la Partida liberaldemocratica vegnida elegida per Yves Christen ch'era sa retratg. Dapi lura ha il chantun Vad reelegì Moret quatter giadas. Moret, ch'ha 49 onns s'engascha dapi passa 20 onns en la politica, è l'emprima dunna dal chantun Vad che surpiglia il sez da la pli auta Svizra.

Resultat da record

Isabelle Moret ha survegnì 193 da las 198 vuschs valaivlas. Per ils proxims 12 mais è Isabelle Moret al timun dal Cussegl naziunal. Enfin uss aveva cusseglier naziunal Hansjörg Walter tegnì il record da la pli clera elecziun: Il 2011 aveva il cusseglier naziunal da la PPS survegnì 185. Marina Carobbio Guscetti (PS), l'antecessura da Moret ha survegnì l'onn passà 154 vuschs, la valur media en l'istorgia da l'elecziun dal pli aut Svizzer u Svizra.

Il Bernais Andreas Aebi (PPS) è vegnì elegì sco vicepresident dal cussegl naziunal. Segunda vicepresidenta è Irène Kälin (Ils Verds) dal chantun Argovia.

Stöckli presidiescha il «Stöckli»

En la chombra pitschna è Hans Stöckli da la PS dal chantun Berna vegnì elegì sco president. El ha survegnì 39 da 41 vuschs valaivlas. El speria da pudair persvader quels che n'hajan betg elegì el cun prestar buna lavur. Hans Stöckli, che vala sco politicher passiunà dentant pragmatic vegn a presidiar durant in onn la chombra pitschna.

RTR novitads 17:00