Siglir tar il cuntegn
Inhalt

Svizra President dal parlament europeic lauda la Svizra

Il president dal parlament europeic Martin Schulz ha ludà la Svizra. Blers politichers europeics duessian prender in exempel da la politica da fugitivs da la Cussegliera federala Simonetta Sommaruga.

Cussegliera federala Simonetta Sommaruga cun il president dal parlament europeic Martin Schulz.
Legenda: Cussegliera federala Simonetta Sommaruga cun il president dal parlament europeic Martin Schulz. Keystone

Questa politica vegnia sustegnida d'ina gronda part da la populaziun, ha ditg Schultz ad in occurrenza electorala da la Partida socialdemocratica a Turgi en il chantun Argovia. Ils fugitivs vegnian en l'Europa perquai ch'els sperian da chattar qua solidaritad, umanitad e libertad.

Realisaziun difficila

Er ha el menziunà l'iniziativa da l'immigraziun da massa ch'il suveran svizzer ha approvà a l'urna. La realisaziun da quella saja difficila, cunquai che la libra circulaziun da persunas saja francada en ils contracts cun la Svizra.

Privel d'ina ruttiva vers la dretga

Martin Schulz è stà giast a l’occurrenza da la partida socialdemocrata Svizra ch’ha cumenzà la fasa finala dal cumbat electoral. Il president da la PS Christian Levrat ha manegià ch'il privel ch'i dettia ina ruttiva vers la dretga ils 18 d'october saja real.

RR novitads 16:00/118:00