L'onn 2014 duvravan persunas cun pajas pitschnas en media 12 % da lur entradas per la cassa da malsauns - il 2010 eran quai anc 10 %. Quai ha constatà l'Uffizi federal da sanadad.
La raschun èn las premias da las cassas da malsauns che creschan. Bain profiteschan persunas cun paucs daners da la reducziun da las premias. Quellas n'èn dentant betg creschidas uschè fitg sco las premias - perquai che blers chantuns spargnan là. L'onn 2014 han Confederaziun e chantuns pajà radund 4 milliardas francs per reducziuns da premias da cassas da malsauns. La Confederaziun ha adattà la summa a l'auzament da las premias. La cumpart dals chantuns è dentant sa reducida da 50 % l'onn 2010 sin 44 % l'onn 2014.
En Svizra po passa in quart da l'entira populaziun profitar da reducziuns da premias da cassas da malsauns.
RR novitads 12:00