Siglir tar il cuntegn

Svizra Precautamain optimistic vers l'enviern

Suenter la nauscha stagiun d'enviern passada duai il turissem svizzer puspè ir modestamain ensi. Il post da conjuctura da l'ETH Turitg KOF prognostitgescha in augment da pernottaziuns da 0,6%. Cuntrari per il Grischun: Ils experts spetgan damain pernottaziuns e damain giasts per las pendicularas.

Sutgeras da suten - en il fund il tschiel blau.
Legenda: Vista da suten: Il Grischun e Vallais ston probablamain sa cuntentar cun pernottaziuns ed entradas da pendicularas stagnondas. Keystone

Per ils territoris da skis svizzers na datti naginas bunas prognosas turisticas. Tenor il post da conjunctura da l'ETH Turitg KOF stagneschan ils dumbers da pernottaziuns l'enviern proxim.

Grischun tira puspè la curta

Il chantun Grischun sto en vista da la proxima stagiun far quint cun damain pernottaziuns. Quai ha in'influenza directa sin las pendicularas, las qualas che ston uschia era quintar cun damain giasts. La digren sa sminueschia dentant.

Per l’onn che vegn saja da quintar cun in augment da l’entira dumonda turistica e cun dapli entradas en il turissem, scriva il KOF.

Dapli giasts da l'Europa

Tuttina quinta il KOF cun in augment da las pernottaziuns en l’entira Svizra per circa 0,6%. La situaziun tar ils giasts da l'exteriur restia dentant tendida.

Probabel datti dapli giasts ord il spazi europeic, dentant sa reducescha vinavant il dumber dals giasts da la Germania e da la Gronda Britannia. Ord quai motiv stagneschan ils dumbers en ils territoris da skis.

Betg dapli giasts indigens

Areguard ils giasts svizzers na vesa il KOF er nagin grond potenzial. Tant la disposiziun dals consuments sco er il svilup economic sajan spussads. Uschia na creschia il dumber da giasts indigens be moderà.

Sco gia l’onn passà vegnan cunzunt las citads a profitar da l’augment svizzer da pernottaziuns.

RR novitads 11:00