Siglir tar il cuntegn
cuntegn

Svizra PPS n'è betg pli part da regenza uranaisa

En il chantun dad Uri perda la PPS suenter sis onns puspè lur sez en la regenza. Il mandat va a la PLD che ha da nov sco la PCD trais sez en il gremi da set. La PS ha pudì defender ses sez.

Il bajetg da la regenza da l'Uri ad Altdorf, fotografà ils 28 da favrer 2016.
Legenda: Il bajetg da la regenza da l'Uri ad Altdorf, fotografà ils 28 da favrer 2016. Keystone

En il chantun dad Uri n’è la Partida populara svizra suenter sis onns betg pli represchentada en la regenza. La Partida socialdemocratica però ha defendì ses sez en il segund scrutini.

La PLD ha gudagnà in ulteriur sez ed ha uss trais sez en il cussegl guvernativ da l’Uri. Era trais sezs en il gremi da set ha la PCD. Quai ha communitgà la chanzlia statala.

Urs Janett (PLD, san.) e Dimitri Moretti (PS, dre.).
Legenda: Ils novs en la regenza uranaisa: Urs Janett (PLD, san.) e Dimitri Moretti (PS, dre.). Keystone

Regenza uranaisa è puspè cumpletta

Nov en il cussegl guvernativ da l’Uri en vegnids elegids en il segund scrutini Urs Janett (PLD) cun 7’248 vuschs e Dimitri Moretti (PS) cun 4’994 vuschs. L’elecziun en il cussegl ha manchentà Petra Simmen (PPS) cun 4’593 vuschs, pertge che vacants eran be anc dus mandats. La participaziun a l’elecziun ha muntà a 40,9%.

En l’emprim scrutini dals 28 da favrer eran ils trais commembers da la regenza vertents da la PCD Beat Jörg, Urban Camenzind e Heidi Z’graggen sco er la vertenta cussegliera Barbara Bär da la PLD vegnids confermads en lur uffizi. Elegì da nov era plinavant il liberal Roger Nager.

RR novitads 14:00