Siglir tar il cuntegn
Inhalt

Svizra PPS annunzia referendum cunter la refurma d'asil

La Partida populara svizra vul ch'il pievel svizzer haja l'ultim pled pertutgant la refurma d'asil. Il schef da fracziun Adrian Amstutz ha annunzià che la partidia lantschia il referendum. Sco raschun ha el numnà tranter auter ils «advocats gratuits» per ils requirents d'asil.

il cusseglier naziunal Adrian Amstutz
Legenda: Adrian Amstutz, il cusseglier naziunal da la PPS da Berna. Keystone

Cun tals advocats vegnia la Svizra anc pli attractiva sco pajais d'asil ha ditg Amstutz. El crititgescha er la limitaziun da las cumptenzas chantunalas tar la tschertga da lieus adattads per centers d'asil.

Las ulteriuras fracziuns na mussan nagina chapientscha per questa decisiun. Ellas rinfatschan a la PPS da betg esser interessada vid schliaziuns. Il cusseglier naziunal dal PCD Stefan Müller Altermatt scriva per exempel sin twitter: «Il PPS na vul betg proceders accelerads, na vul betg meglras structuras, il PPS vul problems.»

La nova lescha d’asil empermetta proceduras d’asil acceleradas che duran maximalmain 140 dis. Per che quellas sajan tutina legalas è previs ina cussegliaziun giuridica gratuita per ils requirents d’asil.

En il parlament ha la PPS cumbattì senza success cunter la refurma d'asil da la cussegliera federala Simonetta Sommaruga.

RR novitads 11:00