Siglir tar il cuntegn
Inhalt

Svizra Postcom cumbatta dumping da paja

L'autoritad da surveglianza Postcom vul evitar ch'i dettia dumping da paja tar ils servetschs da furniziun da pachets. L'auter onn vul ella introducir standards minimals per ils emploiads. Latiers vai per la paja, il temp da lavur e la pretensiun da vacanzas.

purtret da Hans Hollenstein, president Postcom
Legenda: Hans Hollenstein, il president da la Postcom ha dà pled e fatg davart il rapport annual. Keystone

La midada rasanta sin il martgà da la posta pretendia directivas, scriva la Postcom en ses rapport annual. L'aspect negativ dal boom da pachets sco er ils termins da furniziun adina pli curts sa mussia tar il squitsch sin ils collavuraturs. Standards minimals pudessan avair ina gronda muntada ed il dumping da paja vegniss guntgì. Il medem mument pudessan novs concurrents entrar en il martgà. Il 2018 eran registrads tar la Postcom 172 interpresas, tendenza ensi.

Dapli transparenza tar uffizis postals

La Postcom è er s'exprimida davart la serradas d'uffizis postals ed agenturas. Qua dat ella bunas notas a la Posta. I vegnia infurmà pli transparent che pli baud. Tenor l'autoritad da surveglianza è ina gronda part da las midadas planisadas capitadas en cunvegnientscha cun las vischnancas.

En media vegnan transfurmads mintg'onn 100 uffizis postals. Fin l'onn 2020 duain anc vegnir manads en Svizra 800 fin 900 uffizis postals tradiziunals.

RR novitads 11:00