Siglir tar il cuntegn

Svizra Posta stritga 187 plazzas da manischunzs

La Posta svizra vul surlaschar ils transports interns a firmas externas. Ella desista uschia sin l'atgna flotta da camiuns sur 3,5 tonnas e vul scriver or en concurrenza ils transports.

camiun da la posta svizra
Legenda: La Posta svizra schlia sia flotta da camiuns sur 3,5 tonnas, 187 plazzas èn pertutgadas. Keystone

Sco quai che la Posta communitgescha, veglia ella uschia rinforzar sia cumpetitivitad. Pertutgà da la mesira èn 187 plazzas da manischunzs. La posta suttametta a quellas persunas in'offerta per occupar ellas vinavant. Igl existia er in plan social. Il mument dettia quai discurs cun ils sindicats, scriva la posta.

Squitsch da pretsch e da concurrenza

La Posta svizra stat pli e pli sut squitsch da pretsch e da concurrenza. En il martgà da pachets stat ella dapi 2004 en concurrenza libra. En il martgà da brevs sa chattan 70 % da la quantitad da brevs en concurrenza. Areguard quest svilup decimescha la posta dapi intgins onns sia flotta da camiuns per transports interns. La gronda part dals camiuns restants sur 3,5 tonnas sto vegnir restaurada ils proxims onns. Perquai vul la posta desister en il futur dal tut dad agens camiuns per transports interns.

RR novitads 12:00