Siglir tar il cuntegn
cuntegn

Svizra Posta per Schneider-Ammann – ina brev averta

Ina coaliziun d'organisaziuns pretenda en ina brev averta a Johann Schneider-Amann ch'ins excludia ieli da palmas da la cunvegna.

Johann Schneider Ammann.
Legenda: Il cusseglier federal ha survegnì ina brev averta cun pretensiuns areguard la cunvegna da commerzi liber. Keystone

Curt e concis

  • La Svizra e l'Indonesia vulan suttascriver ina cunvegna da commerzi liber.
  • Ina coaliziun d'organisaziuns pretenda en ina brev averta a Johann Schneider-Amann ch'ins excludia ieli da palmas da la cunvegna.
  • L'import d'ieli da palmas ad in pretsch favurisà haja ina influenza negativa per tuts dus pajais, argumentescha la coaliziun.

La Svizra e l'Indonesia en curt avant suttascriver ina cunvegna da commerzi liber. Ieli da palmas duai dentant betg far part da la cunvegna da commerzi liber, pretendan organisaziuns d'umans, da l'ambient, dals consuments e da purs. Questa pretensiun ha la coaliziun d'organisaziuns adressà a Johann Schneider-Ammann en ina brev averta.

Consequenzas negativas per tuttas duas varts

En la brev avertescha la coaliziun a las consequenzas d'in import dad ieli da palmas da l'Indonesia ad in pretsch favurisà. Sche la dumonda dad ieli da palmas creschia, cuntinueschian las interpresas da stgatschar la populaziun indigena per emplantar palmas d'ieli sin il terren, argumentescha la coaliziun opponenta. E cun la producziun augmentada pateschia l'ambient supplementarmain.

Ma er per la Svizra haja l'import dad ieli da palmas favuraivel consequenzas negativas: Ils purs pitschens gudagnassan pli pauc daners cun ieli indigen. La fiera dad ieli da raps e da flurs sulegl patiss.

RR novitads 11:00