Siglir tar il cuntegn
Inhalt

Svizra Polizia tschertga vinavant terrorists suspectads a Genevra

La polizia ha cuntinuà il venderdi la tschertga da terrorists suspectads en la citad da Genevra ed il conturn. Il stgalim d'avertiment restia aut, han communitgà las autoritads da segirezza. Il mintgadi en la citad cuntinuescha entant sco adina.

Forzas da segirezza fan guardia avant la sedia principala da l'ONU a Genevra.
Legenda: Forzas da segirezza fan guardia avant la sedia principala da l'ONU a Genevra. Keystone

La situaziun actuala a Genevra na saja betg da cumparegliar cun la situaziun a Brüssel, ha ditg il directur da segirtad Pierre Maudet a la gasetta «Le Temps».

Per la sedia da las Naziuns Unidas a Genevra sco era per sinagogas, l’eroport e staziuns èn las mesiras da segirezza vegnidas rinforzadas.

Suspectads duain avair contact cun attentader da Paris

La procura publica federala ha avert la gievgia ina procedura penala cunter nunenconuschent pervi dal suspect d'avair sustegnì gruppaziuns terroristicas sco Al-Kaida ni il Stadi Islamic. L'ambassada americana a Berna ha avertì ses burgais americans d’esser precaut.

La gasetta genevrina «Le Matin» aveva rapporta che plirs suspectads sajan vegnids cun auto numer beltg da la Frantscha a Genevra. In dals suspectads duai enconuscher Salah Abdelslam: lez duai avair participà als attentats a Paris ed è uss en fugia.

Dispositiv da segirezza rinforzà n’è betg vesaivel

Il venderdi a bun’ura èn ils abitants da Genevra sa rendì a la lavur sco adina. Il dispositiv da segirezza da la polizia na croda betg si. Ils temps da spetga resultan da las colonnas usitadas tras la surchargia dal traffic.

Anc la gievgia saira stuevan passants per part spetgar dapli ch’in’ura als cunfins, perquai che las autoritads da segirezza avevan rinforzà las controllas.

RR novitads 11:00 / 12:00