Il cas «Jegge» era vegnì a la glisch il cumenzament d'avrigl cun la publicaziun dal cudesch «Jürg Jegges dunkle Seite». En quel descriva l'anteriur scolar Makus Zangger, co che Jegge haja malduvrà el durant onns sexual- e psichicamain.
Jegge è pedagog ed autur svizzer. Ses emprim cudesch «Dummheit ist lernbar» è cumparì il 1976. El è vegnì vendì pli che 200’000 giadas e vala anc oz sco ovra da standard per pedagogia senza sforz. Jegge è in criticher dal sistem d’educaziun svizzer. El è da l’avis, che mintgin duai vegnir scolà individualmain tenor sias atgnas fermezzas.
Terapias abstrusas sco context dal maldiever
Zangger era vegnì cun 12 onns en ina scola speziala en il chantun Turitg. Là saja el stà expost durant onns a l’um, che valeva fin da curt sco star-pedagog. Jegge haja per exempel constrenschì a ses protegì cun il pretext dad ina mesira terapeutica da masturbar ensemen.
Quatter dis suenter la publicaziun dal cudesch ha Jegge concedì, dad avair gì ils onns 70 contacts sexuals cun differents scolars. Il pedagog saja stà da l’avis che quai saja ina buna chaussa che stettia en il rom dad ina teoria pedagogica dals onns 70 e saja uschia en l’interess dal scolar.
Chantun Turitg: La «responsabladad morala» envers ils uffants
Per quels acts na po la giustia betg pli accusar el, cun quai ch’els èn surannads. La directura da furmaziun turitgaisa Silvia Steiner ha dentant annunzià a la gasetta «NZZ am Sonntag», da vulair laschar lavurar si il cas. Il chantun haja ina «responsabladad morala» envers ils uffants che sa chattavan quella giada en la tgira da quella scola.
Procura publica turitgaisa sclerescha
La procura publica turitgaisa ha avrì ina «procedura dad examinaziun preliminara» en il cas Jegge. La Tagesschau dad SRF suppona, che la procura veglia sclerir sch’i dettia anc auters cas d’abus da Jegge che n’èn anc betg surannads.
Suenter che las rinfatschas envers Jegge eran vegnidas enconuschentas, eran s’annunziadas pliras persunas cun rinfatschas sumegliantas tar medias Svizras. Jegge aveva ditg en in intervista da televisiun dad avair malduvrà «main che 10 scolars», fertant che Zangger discurra da «silmain 10 victimas».
RR novitads 12:00