Siglir tar il cuntegn

Svizra Polizia confiscescha 280 armas en ina chasa

La polizia chantunala dal Son Gagl ha arrestà in martgadant d'armas illegalas. L'um da 61 onns duai avair vendì illegalmain armas en l'Austria.

Tar ina perquisiziun da la chasa da l'um da 61 onns a Degersheim en il Son Gagl ha la polizia chattà radund 280 armas, ina gronda massa da muniziun ed 1,3 milliuns francs en daners bluts. Il commerziant dad armas n'haja dentant nagin affar dad armas uffizial. La polizia investighescha dapi il fanadur, suenter che las autoritads da l'Austria eran vegnidas sin ils fastizs da l'um.

Bler è anc avert

Nua che l'um ha cumprà sias armas, ed a tgi ch'el ha vendì ellas, na sa la polizia anc betg. Era betg cler è, sche ulteriuras persunas èn involvidas en las fatschentas illegalas. Las inquisiziuns sajan vastas, ed ins saja pir a l'entschatta, di il pledader da la polizia, Gian Andrea Rezzoli. Actualmain parta la polizia dal fatg ch'el haja lavurà sulet.

RR novitads 11:00