Siglir tar il cuntegn

Svizra Polizia arrestescha danovamain funcziunaris da la FIFA

Curt avant novas discussiuns e tractativas dal comité executiv da la Federaziun mundiala da ballape FIFA èn duas persunas vegnidas arrestadas a Turitg. La polizia chantunala da Turitg ha confermà questa acziun.

Auto da polizia davant l'hotel Baur Au Lac a Turitg.
Legenda: La polizia arrestescha ulteriurs funcziunaris da la Fifa a Turitg. Keystone

Lieu d’acziun è puspè stà l'hotel da luxus Baur au Lac a Turitg. La polizia chantunala saja entrada en l’hotel la damaun a las 6.00 uras, quai tar in’entrada separada. Durant l'acziun èn 2 funcziunaris auts da la FIFA vegnids arrestads. Da las persunas arrestadas sa tracti da Angel Napout dal Paraguay e da Alfredo Hawit da Honduras. Omadus èn vicepresidents da la FIFA. Als umens vegn rinfatschà d'avair lavà daners suspectus e cugliunaria.

Arrestads na vulan betg vegnir extradids

Tenor indicaziuns da l'Uffizi federal da giustia sa dostan ils funcziunaris da vegnir extradids als Stadis Unids da l'America. Uschia ston las autoritads americanas tschentar ina dumonda d'extradiziun uffiziala.

Executiva pretenda refurmas

Entant ha l'inscunter dal comité executiv da la FIFA gì lieu sco planisà a Turitg. Betg da la partida èn stads Sepp Blatter e Michel Platini. Il comité saja sa cunvegnì unanimamain sin propostas da refurmar la FIFA. Tranter auter duaja il temp d'uffizi tant dal president sco er dals commembers dal comité executiv vegnir limità sin 12 onns. Er las pajas duajan vegnir fatschas transparentas. Quai ha communitgà la FIFA.

RR novitads 08.00