Il Cussegl federal resta per gronda part tar ses plans per la politica agrara 2022, quai malgrà la critica durant la consultaziun.
- Il Cussegl federal vul tranter il 2022 e 2025 investir radund 14 milliardas francs per l'agricultura
- Las pretensiuns minimalas per la scolaziun duain dentant vegnir auzadas
- Da nov duai dar ina basa legala per che la Confederaziun possia sa participar finanzialmain tar las premias per l'assicuranza per eveniments da l'aura
Novs retschaviders da pajaments directs da la Confederaziun ston avair ina meglra scolaziun, ha ditg il cusseglier federal Guy Parmelin. L'examen professiunal na duai dentant betg esser ina premissa. Ultra da quai vul il Cussegl federal investir ils onns 2022 enfin 2025 radund 14 milliardas francs en l'agricultura. Quai è circa tuttina bler sco fin oz.
Mesiras concretas fin il 2020
Fin l'emprim quartal 2020 duai il Departament federal d'economia, furmaziun e retschertga elavurar in messadi per il parlament. Ina maioritad dal parlament sustegn las finamiras e la direcziun, ha communitgà il Cussegl federal. Nagin dubiteschia che la politica agrara stoppia vegnir adattada als basegns actuals.
Il Cussegl federal vul da nov stgaffir ina basa legala per che la Confederaziun possia sa participar finanzialmain tar las premias per l'assicuranza per eveniments da l'aura. Entras quai vul il Cussegl proteger meglier l'agricultura tar perditas da racolta entras la midada dal clima.
RR novitads 16:00
