La dumengia a bun’ura ha in um da 42 onns attatgà policists da la citad da Turitg cun in grond cuntè. Dus policists han sajettà sin l’um e blessà el.
Tenor indicaziuns da la polizia da la citad da Turitg è l’um crudà en egl ad ina patruglia curt suenter las 6 da la damaun. L’um sa chattava en la Birmensdorferstrasse en il circul 3 da Turitg ed aveva in grond cuntè enta maun. Cun il sustegn d’ina segunda patruglia han ils policists vulì retegnair e controllar l’um.
Sajets suenter plirs cloms d’avertiment
Cura che l’um ha vis ils policists, è el currì envers els cun in cuntè enta maun. Pervi da questa situaziun d’urgenza hajan dus unifurmads fatg diever da lur arma; quai suenter plirs cloms d’avertiment, uschia la polizia en in messadi.
En consequenza è l’um vegnì blessà ed ha stuì vegnir transportà en l’ospital cun blessuras da sajet nunenconuschentas. Al lieu dal delict èsi vegnì segirà in cuntè da charn da 25 centimeters lunghezza.
L’attatgader è oriund da l’Etiopia ed ha 42 onns. Betg enconuschent èsi, daco che l’um gieva tras las vias cun in cuntè. Las ulteriuras retschertgas vegnan fatgas da la procura publica IV e da la polizia chantunala da Turitg.
RR novitads 11:00 / 14:00