Siglir tar il cuntegn

Header

cuntegn

Svizra «Pokémon Go» – edì uffizialmain en Svizra

Il gieu che chaschuna dapi bun 10 dis per roschas da passants che guardan dapli sin lur telefonin che sin l'ambient è vegnì edì uss era uffizialmain per telefonins cun iOS (iPhones) ed Android.

In maletg da computer dad in pokemon pitschen radund rosa cun duas ureglias da piz, combas curtas e bratscha fitg curta. Davostiers ina foto 'reala' da la Reichsgasse a Cuira.
Legenda: In «Piepi» avant il Hotel Stern a Cuira. RTR, Michel Decurtins / Grafica: Nintendo

Il gieu «Pokémon Go», ina app per telefonins, è vegnida edida avant bun 10 dis ed ha fatg furora: Gia suenter paucs dis èn milliuns giugaders a la chatscha da las creatiras virtualas cun lur telefonins.

Dapi sonda ils 16 da fanadur datti l’app uss era da chargiar giu via las funtaunas uffizialas per apps. Fin da lura pudev'ins stgargiar ella u da funtaunas nunuffizialas u cun in conto en ina tiara nua ch'il gieu era gia vegnì edì.

Fastidis pervi da segirezza da datas

L'agentura da novitads SDA rapporta ch'In expert d’informatica aveva avertì ch’il gieu veglia access a bleras datas dals telefonins, concret sin l’entir conto da Google.

Per part saja quai er stà il cas, ma per sbagl, sco il sviluppader Niantic Labs ha communitgà. Pokémon Go haja be access al num da l’utilisader ed a l’adressa d’e-mail. «Naginas autras datas dal conto da Google vegnan u èn vegnidas rimnadas», uschia Niantic Labs.

Success finanzial per Nintendo

Tge èn Pokémon?

Avrir la box Serrar la box

Pokémon (engl. Pocket Monsters, rum. monsters da tastga) èn creatiras fantasticas d’ina seria da gieus da computer. Ils giugaders pon pigliar, rimnar e trenar quests monsters.

L’emprim gieu è cumparì il 1996. Dapi lura hai dà in gieu da rimnar cartas, numerus products e dapi il 1998 fin uss 17 films da kino.

  • Sviluppader: Game Freak
  • Editur: Nintendo

La svelta derasaziun e la popularitad da Pokémon Go han catapultà ad aut la valita da l’aczia dal concern da gieus da computer giapunais Nintendo.

Be il mardi passà ha l’aczia gudagnà bunamain 13% ed ha serrà cun 22’840 Yen (radund 220 francs). Durant ils ultims quatter dis (incl. mardi) aveva la bursa a Tokio notà in plus da totalmain 59% per l'aczia da Nintendo.

Artitgels legids il pli savens