Plirs success da recurs per la Fundaziun da la cuntrada

L'onn passà ha la Fundaziun svizra per la protecziun da la cuntrada pudì mantegnair la quota da success da ses recurs. Dals 29 cas terminads il 2015 ha l'organisaziun gì en 20 cas success, quai munta ina quota da 69%.

Profils da construcziun avant ina culissa alpina.

Legenda da maletgs: Sche necessari fa la Fundaziun diever dal dretg da recurs d'organisaziun, ma quai sulet 8% da sia lavur. Keystone

L'onn 2014 era ella anc tar 68%. Sco quai che la Fundaziun per la protecziun da la cuntrada communitgescha, èn 5 cas vegnids approvads per part, 11 projects da construcziun èn vegnids meglierads fermamain u gist abolids dal tuttafatg. Er sajan 4 projects vegnids midads ed en 9 cas èn ils recurs vegnids refusads, scriva la Fundaziun per la protecziun da la cuntrada. L’utilisaziun dal dretg da recurs da l’organisaziun n’è betg la lavur principala da la Fundaziun sulet 8% da tut la lavur fatga vegn impundida en recurs, ma l’effect da tals è gronds, scriva la Fundaziun.

Paucs cas vegnan schliads avant dretgira

Ils cas da recurs vegnan per gronda part schliads sin il plaun da protesta e betg sur las instanzas e las dretgiras. Uschia èn il 2015 sulet 6 cas vegnids decis avant dretgira, 4 da quests èn vegnids approvads per gronda part, in cas cun retrair il project terminads, quai che munta ina bilantscha da success per la fundaziun da 83%, scriva la Fundaziun per la protecziun da la cuntrada.

RR novitads 14:00