Plirs incendis da Silvester

La notg da Silvester hai dà plirs incendis en Svizra. Uschia hai tranter auter brischà a Zumikon (ZH) en ina chasa d’ina famiglia, a Mauren (FL) en ina chasa da pliras famiglias ed a Balsthal (SO) è ina scrinaria brischada dal tuttafatg.

La scrinaria era gia dal tut en flommas ed ils pumpiers n'han betg pli pudì stizzar il bajetg.

Legenda da maletgs: La scrinaria era gia dal tut en flommas ed ils pumpiers n'han betg pli pudì stizzar il bajetg. Keystone

En il vitg da Balsthal en il chantun Soloturn è la notg passada ina scrinaria brischada dal tuttafatg. Curt avant las 11 da la notg èn ils pumpiers vegnids clamads al brischament. La scrinaria era gia dal tut en flommas ed ils pumpiers n'han betg pli pudì stizzar il bajetg.

Tenor indicaziuns da la polizia chantunala dal Soloturn muntan ils donns a plirs milliuns francs. Il motiv dal brischament n’è anc betg cler. Blessads n’hai dà nagins. Ils pumpiers eran en acziun l’entira notg cun circa 200 persunas.

Laschar ir video «Brand in Balsthal (unkommentiert)»

Brischament en il Balsthal

0:32 min, dals 1.1.2016

Brischaments er en chasas

A Zumikon en il chantun Turitg è ina chasa d’ina famiglia brischada. Ils donns muntant tenor indicaziuns da la polizia a 200’000 francs. Nagin saja vegnì blessà. Brischà haja quai probabel pervia d’in defect tecnic.

En il Principadi dal Liechtenstein a Mauren hai brischà en ina chasa da pliras famiglias. Trais persunas han stuì vegnir transportadas en l’ospital pervia da tissientadas da fim.

Ed er en la citad da Son Gagl ha in pignol da Nadal tschiffà fieu en ina abitaziun. Ils donns chaschunà dal fieu muntan tenor indicaziuns da la polizia a passa 100’000 francs.

RR novitads 12:00