Siglir tar il cuntegn

Header

Navigaziun

Persunas che tegnan cartas da lur cassa da malsauns.
Legenda: L'entschatta dal november passà avevan anc 14% dals assicurads inditgà da vulair midar lur cassa da malsauns. Keystone
cuntegn

Svizra Pli paucs han midà cassa da malsauns

Malgrà che las premias da las cassas da malsauns èn creschidas en media per 5,8%, han be paucas persunas midà la cassa da malsauns. Sco il portal online da cumparegliaziun Comparis scriva, han 8,3% da las persunas tschernì in’autra assicuranza. Quai èn damain che spetgà.

Radund 684’000 persunas en Svizra han voluntarmain midà lur cassa da malsauns. Vitiers vegnan anc 570’000 persunas ch’èn stadas sfurzadas da midar, perquai che lur assicuranza è vegnida serrada.

Tenor Comparis è la quota da midar cassa cun 8,3% per l’emprima giada dapi il 2012 pli pitschna che l’onn precedent. Sin il 2016 avevan anc 8,6% dals assicurads midà lur cassa.

Giuvens midan il pli savens, Tessinais il pli cuntents

Il pli savens midan giuvnas e giuvens en Svizra la cassa da malsauns. Uschia sajan 12,3% da las persunas tranter 18 e 35 onns sa decididas il 2017 per ina nova cassa, scriva Comparis. Pli vegls ch’ils assicurads èn, e main savens ch’els midan lur assicuranza.

Ina differenza regiunala dettia quai en la Svizra romanda. Là hajan 17,5 dals assicurads inditgà ch’i saja memia stentus da midar la cassa. En la Svizra tudestga sajan quai be 9,5%. Il pli cuntents cun lur cassa da malsauns èn ils Svizzers en il Tessin, suandads dals Svizzers tudestgs e lura dals Svizzers romands.

RR novitads 07:00