Siglir tar il cuntegn

Header

La sala dal Cussegl naziunal.
Legenda: La chombra gronda suonda il Cussegl federal e stritga al Grischun passa 90'000 francs per la tgira da cultura e lingua. Keystone
cuntegn

Svizra Pli paucs daners per cultura e lingua

Il Cussegl naziunal ha reduci la contribuziun da la Confederaziun al Grischun per 90'700 francs.

Pel Grischun èsi i per 90’700 francs. Tant pli pauc duai il chantun Grischun survegnir da la Confederaziun sco sustegn per la tgira da la cultura e da la lingua. Il Cussegl naziunal ha decis quai cun 124 cunter 71 vuschs.

Uschia segua la chombra gronda a la proposta dal Cussegl federal.

audio
Saira: Budget svizzer 2018 – pli paucs raps per il Grischun
ord Actualitad dals 04.12.2017.
laschar ir. Durada: 2 minutas 11 Secundas.

Tut las Grischunas ed ils Grischuns cunter stritgar

Per la cussegliera naziunala Silva Semadeni (PS) vegnia spargnà qua nua che quai na fetschia betg da basegn. Per la lingua e la cultura grischuna sajan quels daners necessaris per finanziar projects essenzials per il futur dal rumantsch e da tschellas linguas minoritaras. Per la Confederaziun na sajan quels bun 90’000 francs dad in preventiv da passa 71 milliardas francs betg in grond burdi. Per las organisaziuns saja dentant er quella summa modesta da grond’impurtanza, di la social-democrata.

Er ils auters parlamentaris grischuns han cumbattì ensemen cun la PS ed ils Verds per ch’ils daners na vegnian betg stritgads al Grischun – quai dentant senza success.

Burgais en il parlament sin lingia dal Cussegl federal

La gronda part da las partidas burgaisas en il Cussegl naziunal han vesì quai auter. La Confederaziun stoppia spargnar ha argumentà Thomas Aeschi, il schef da la fracziun da la Partida Populara Svizra PPS. Sco adina tar las reducziuns a tagl travers dal preventiv possia quai avair consequenzas rigurusas. Sch’ins cumenzia dentant da far excepziuns n'haja quai nagina fin.

Perquai haja ina maioritad dal Cussegl naziunal decidì da suandar il curs dal Cussegl federal. Il Grischun survegn perquai il 2018 be pli 4,765 milliuns francs sustegn da la Confederaziun per la tgira da la cultura e la lingua. Quai èn passa 90’000 francs pli pauc che quest onn.

RR actualitad 17:40

Artitgels legids il pli savens