Siglir tar il cuntegn
cuntegn

Svizra Pledoyer per digitalisaziun da l'economia

Economiesuisse, la federaziun tetgala da l'economia svizra, pretenda che la politica na duai betg intervegnir cun regulaziuns severas en la digitalisaziun da l'economia. Lezza porschi grondas schanzas e na dastgia betg vegnir bloccada.

Heinz Karrer, il president d'Economiesuisse guarda sin ses telefonin.
Legenda: Pront per la digitalisaziun. Heinz Karrer, il president d'Economiesuisse, vesa en la quarta industrialisaziun ina schanza per la Svizra. Keystone

La dumonda saja simpla, di Heinz Karrer, il president d'Economiesuisse. Essan nus ils pilots da la transfurmaziun digitala ni mo passagiers. I na saja numnadamain betg relevant sch'ins haja il sentiment che quella midada vi tar la digitalisaziun saja ina schanza ni in privel. L’uschenumnada quarta revoluziun industriala saja realitad e la Svizra stoppia avair il curaschi da far quai pass.

Start-ups cun potenzal

“Nus vesain con spert che novs models da fatschenta sa sviluppeschan, per exempel Uber ni AirBnB. Talas plattafurmas pon era vegnir sviluppadas en Svizra. La scena da start-up è da gronda muntada en Svizra.”

Quitads fa a Karrer la tendenza a dapli protecziunissem e naziunalissem. Sco naziun d'export saja la Svizra fitg dependenta dal commerzi liber. Las tendenzas isolaziunisticas els Stadis Unids sajan tissi per l'economia svizra.

RR novitads 12:00