Siglir tar il cuntegn
Inhalt

Svizra Plazzas da lavur tar Syngenta n’èn betg periclitadas

La vendita da Syngenta al concern statal chinais ChemChina n’ha a media vista nagin effect sin las plazzas da lavur en Svizra. Quai pervia d'in dretg da veto ch'ils quatter commembers da Syngenta han en il nov cussegl d'administraziun.

Ina fotografia da Christoph Mäder, commember da la direcziun da Syngenta.
Legenda: Christoph Mäder, commember da la direcziun da Syngenta. Keystone

La vendita dal concern d'agrochemia da Basilea Syngenta a ChemChina n'haja a media vista naginas consequenzas per las plazzas da lavur e las activitads da perscrutaziun en Svizra. Quai ha ditg Christoph Mäder che fa part da la direcziun da Syngenta en la «Samstagsrundschau» da radio SRF.

Era suenter l'acquisiziun da ChemChina haja la Syngenta quatter agens commembers en il cussegl d'administraziun. Quels hajan il dretg da veto tar decisiuns che sa drizzian encunter l'interess da l'interpresa.

Suenter lungas tractativas han ils dus concerns Syngenta e ChemChina comunitgà il venderdi ch'ils acziunaris da Syngenta hajan acceptà l'offerta dal concern statal ChemChina.

RR novitads 14:00