Siglir tar il cuntegn

Svizra Plantas en las Alps pruin adina pli baud

En las Alps Svizras è il spustament temporal dal pruir da la feglia tranter regiuns autas e regiuns bassas sa sminuì ils davos 50 onns. Quai mussa in nov studi da l'Institut federal per la perscrutaziun da guaud, naiv e cuntrada (WSL) e da l'universitad da Neuschatel.

Duas plantas pruin ord la terra.
Legenda: Oz sa furma la feglia en ils auts be trais emnas pli tard che en regiuns bassas (maletg da simbol). Pixabay

Tenor il nov studi è il ruaus d'enviern dals brumbels sa sminuì ils davos 50 onns considerablamain. Quai pervia dal stgaudament dal clima. L'entschatta dals onns 1960 sa furmava la feglia da las plantas radund tschintg emnas pli tard pro 1'000 meter differenza d'autezza. Oz è la differenza da temp enturn trais emnas.

20'000 observaziuns dapi il 1960

Ils perscrutaders han analisà passa 20'000 observaziuns che voluntaris han fatg dapi il 1960 e che Meteo-Svizra ha rimnà. Quellas observaziun pertutgan la furmaziun da feglia e guilas da faus, pigns, lareschs e nuschers.

Ils resultats mussian cleramain ch'il pruir da la feglia entschaivia generalmain pli baud. En ils auts na pruja la feglia oz betg mo pli baud, l'entir process giaja era pli spert che en regiuns pli bassas. Sa sminuì saja la differenza cunzunt suenter il enviern chaud.

RR novitads 06:00