La natiralisaziun facilitada n'è nagin hit tar ils esters da la terza generaziun. Da las 25'000 persunas che vegnan en dumonda per ina tala natiralisaziun han ils emprims trais mais be 185 persunas inoltrà ina dumonda. Quest dumber saja en mintga cas pli bass che spetgà. Ad ina natiralisaziun nuncontrollada, da la quala è vegnì avertì avant la campagna da la votaziun, n'èsi fin uss betg vegnì.
Las pli bleras dumondas inoltradas per ina natiralisaziun facilitada èn vegnidas da persunas da l'Italia suandà da persunas da la Tirchia sco era dal Portugal.
Dapli che 60% eran persuenter
La natiralisaziun facilitada era vegnida approvada l'onn passà cun passa 60% dal suveran svizzer. En dumonda per ina natiralisaziun pli simpla vegnan persunas ch'èn tranter auter naschidas en Svizra, han fatg almain tschintg onns scola en Svizra e disponan d'ina permissiun da domicil C. Cundiziun è era, ch'els èn integrads bain. Ultra da quai sto era in genitur avair fatg almain tschintg onns ina scola svizra.
RR novitads 10:00