Siglir tar il cuntegn

Svizra Pierin Vincenz vegn en arrest d'inquisiziun

Il banchier grischun, anteriur schef da la Raiffeisen, resta uschia en praschun. Questa decisiun ha prendì il derschader d'arrest turitgais il venderdi saira. Era per la segunda persuna involvida ha il derschader decidì arrest d'inquisiziun.

Purtret da Pierin Vincenz.
Legenda: La Procura publica ha dumandà arrest d'inquisiziun per Pierin Vincenz, il derschader respunsabel è suandà a la dumonda. Keystone

Curt e concis

  • L'anteriur schef da la banca Raiffeisen sto restar en praschun.
  • A Pierin Vincenz vegn renfatschà administraziun malfidaivla.
  • Pierin Vincenz sez refusa tut las renfatschas.
  • La procura publica na dat il mument naginas ulteriuras infurmaziuns.

A Pierin Vincenz vegn renfatschà administraziun malfidaivla, perquai ha la procura publica dal chantun da Turitg avert ina procedura penala encunter el. Dapi mardi è el en arrest. Lura ha la procura publica era intercurì sia chasa en l'Appenzell e segirà material da cumprova.

Pierin Vincenz duai avair fatg donn a duas firmas u schizunt avair profità sez finanzialmain. Saja quai sco schef da la Raiffeisen u sco president dal cussegl d'administraziun da la firma da cartas da credit Aduno. Schef da la Raiffeisen è el stà fin l'onn 2015 e president da la firma Aduno fin la stad 2017.

Peter V. Kunz, professer per dretg d'economia a l'universitad da Berna, declera tge che administraziun malfidaivla munta insumma. Administraziun malfidaivla è in delict penal. Chastiada vegn ina persuna ch'è obligada d'administrar la facultad d'insatgi e na fa quai betg a moda correcta: Pia insatgi vegn donnegià pervia dal sa cuntegnair d'in'autra persuna.

Vendì participaziuns memia char?

En il cas concret da Pierin Vincenz, pudessi tenor Peter V. Kunz esser ch'el haja en sia rolla sco schef da la Raiffeisen u sco president dal cussegl d'administraziun da l'Adeno fatg schlettas fatschentas. Per exempel pudess quai esser che la Raiffeisen u l'Aduno han cumprà participaziuns memia charas tar autras interpresas. Uschia avess el chaschunà a la Raiffeisen u l'Aduno in donn finanzial.

En il cas che Pierin Vincenz avess profità sez da quai stuess el quintar cun in chasti dad enfin tschintg onns praschun e betg mo trais onns sco tar administraziun malfidaivla suletta.

Tge spetga el?

Malgrà ch'in chasti maximal da trais fin tschintg onns praschun fiss pussaivel, quinta Peter V. Kunz cun quai che Vincenz na stoppia probabel insumma betg ir en praschun. Quai perquai ch'el n'è enfin uss anc mai vegnì sentenzià. El stoppia dentant quintar cun in chasti da daners u praschun cundiziunada - sch'i vegnia lura propi cumprovà ch'el haja fatg sbagls.

Legende: Video Raiffeisen: Onn da record e lingias grassas pervi da Pierin Vincenz abspielen. Laufzeit 2:32 Minuten.
Or da Telesguard dals 02.03.2018.

RR novitads 06:00++