Siglir tar il cuntegn
Inhalt

Svizra Pesticids en l'aua da baiver

Tar mintga 5avla tschiffada d’aua en Svizra èn vegnidas mesiradas memia autas concentraziuns da pesticids, quai mussan las datas ord da l'observaziun da l'aua, scriva la gasetta NZZ am Sonntag.

Ina spina d'aua cun aua che curra en in magiel.
Legenda: 20% da l'aua da baiver cuntegna memia bler pesticids. Keystone

Las pli novas datas da l’observaziun naziunala d’aua sutterrana «Naqua» fan quitads. Tar mintga tschintgavla emprova d’aua è vegnì constatà ina concentraziun memia auta da pesticids ubain dals products da decumposiziun da quels. En territoris cun in’agricultura intensiva era la limita schizunt surpassada tar 70% da las emprovas d’aua. Quai scriva la NZZ am Sonntag.

Sco cuntramesira pretendan uss ils experts da scumandar pesticids en las zonas da protecziun enturn las tschiffadas d’aua. La Confederaziun duai preschentar megliuraziuns liantas per tuts. Senza mesiras concretas na possia en futur betg vegnir purschì aua da baiver senza stuair duvrar blers daners per preparar quest'aua.

RR novitads 08:00