Siglir tar il cuntegn

Svizra «Pesta da lieurs» sa derasa

En Svizra s'infecteschan adina dapli persunas da la tularemia, ina malsogna che pertutga savens animals ruiders. Cunquai ch'ils mals sumeglian a quels da la pesta e perquai che savens lieurs èn pertutgadas vegn la malsogna er numnada la «pesta da lieurs».

Zecca.
Legenda: Savens vegn la malsogna surportada da zeccas. Keystone

130 persunas èn l'onn passà s'infectadas cun l'uschenumnada pesta da lieurs, er numnada tularemia (entras la bacteria Francisella tularensis). Quai èn, sco quai che las cifras da l'uffizi federal per statistica mussan, marcantamain dapli che l'onn precedent. Però betg mo il 2017 hai dà in augment considerabel, il trend è en ils davos onns en general creschent.

  • 2009: 6 cas
  • 2010: 14 cas
  • 2011: 14 cas
  • 2012: 41 cas
  • 2013: 28 cas
  • 2014: 38 cas
  • 2015: 50 cas
  • 2016: 57 cas

Il motiv per l'augment tar las persunas saja ina consequenza da quai ch'i dettia dapli animals che sajan infectads e possian uschia contagiar la populaziun, declera Daniel Koch da l'Uffizi federal per sanadad publica (BAG).

Tge è la pesta da lieurs?

La pesta da lieurs è ina malsogna pauc enconuschenta che vegn savens surportada da zeccas. Ils sintoms èn auta fevra, nufs limfatics inflammads e midadas da la pel.

Tractar pon ins la malsogna cun antibiotica. Sche la malsogna na vegn però betg tractada po ella esser mortala.

RR novitads 12:00