Siglir tar il cuntegn
Inhalt

Svizra Persunas cun impediment han pli grond privel da paupradad

Tgi che viva en Svizra cun in impediment è pli fitg en privel da paupradad. Plinavant haja quella glieud pli grev da chattar ina plazza. Quai ha communitgà l'Uniun tetgala da las organisaziuns per persunas cun impediments a chaschun dal di internaziunal da persunas cun impediments.

Duas persunas cun impediment vid la lavur.
Legenda: Persunas cun impediments duajan vegnir integradas meglier en il martgà da lavur. Keystone

Savens vegnia glieud cun impediment era discriminada pervia da lur menda. Uschia hajan persunas cun impediment difficultads da manar ina vita independenta. Perquai pretenda «Inclusiun Handicap» medems access al martgà da lavur.

Anc lunsch davent da las pretensiuns da l'ONU

Tras la convenziun da l'ONU dal dretg da persunas cun impediments saja la Svizra s'obligada da dar ils medems dretgs en tut ils secturs da la vita. Sco l'Uniun tetgala da las organisaziuns per persunas cun impediments scriva, saja la Svizra dentant anc lunsch davent da quai.

La stad ha l'uniun «Inclusion» fatg il facit che la Svizra haja fin ussa manchentà sia obligaziun da resguardar il dretg internaziunal er envers persunas cun impediment. I dettia grondas luccas en la lescha. Era vegnia l'opiniun da persunas cun impediment resguardà memia pauc.

I fiss bi, sch'ins lavurass vidlonder, ch'i sa chapiss da sasez che persunas cun impediment vegnissan integradas en il martgà da lavur.
Autur: Doris Leuthardpresidenta da la confederaziun

Tenor la presidenta da la Confederaziun Doris Leuthard saja impurtant che persunas cun impediments vegnian integradas pli fitg en il martgà da lavur. Era sch'i dovria magari in grond effort da mintga singula persuna.

RR novitads 16:00