Siglir tar il cuntegn

Svizra Persunas ch’educheschan sulet han in grond ristg da povradad

Zunt pertutgadas èn persunas ch’educheschan lur uffants sulet. Mintga segunda da quellas persunas na vegn betg da pajar in quint nunspetgà da passa 2’500 francs durant il mais actual. Quai mussan cifras dal 2016 da l’Uffizi federal da statistica.

Mammas cun charrotschas d'uffants
Legenda: Educar persul uffants, è tant per dunnas sco per umens ristgus quai che pertutga ils daners. Keystone

Cunzunt persunas tranter 25 e 49 onns èn malcuntentas da lur situaziun finanziala. Bunamain mintga dieschavla n’ha betg ils daners per far vacanzas dador l’atgna chasa. E l’Uffizi da statistica vegn al resultat che var 7% da la populaziun svizra è periclitada da povertad.

Malgrà quai tucca la Svizra anc adina tar quests pajais en Europa che han in dals pli auts standards da vita insumma, scriva l’Uffizi federal da statistica. E precisescha che quest standard aut vala era sch’ins resguarda quant che la vita en Svizra custa.

RR novitads 12:00