Il Cussegl naziunal na vul betg dublegiar la milliarda da coesiun. La maioritad burgaisa dal Cussegl naziunal ha refusà la dumonda da la Cumissiun per la politica exteriura. Cunquai che la fatschenta n'è betg stada tema en il Cussegl dals chantuns è ella giud maisa.
L'idea da la cumissiun era da pajar duas milliardas da coesiun a l'Uniun europeica, per uschia survegnir access als programs da perscrutaziun da l'UE. Tenor Cristine Badertscher dals Verds avess la milliarda dublegiada duì dar al Cussegl federal la pussaivladad da far in signal politic.
Esser exclus dal program da perscrutaziun saja in dals gronds problems da la politica exteriura, ha ditg il cusseglier federal Ueli Maurer. Cun dublegiar la milliarda da coesiun sa blamass la Svizra dentant.
