Siglir tar il cuntegn
Inhalt

Svizra Pensiunament duai daventar pli flexibel

La vegliadetgna da pensiun da las dunnas duai vegnir auzada sin 65 onns. Il pensiunament duai esser pussaivel a moda flexibla tranter 62 e 70 onns. Latiers duai la nova refurma da la prevenziun per la vegliadetgna porscher stimuls per lavurar er suenter 65.

Senioras e seniors che giaudan lur temp liber.
Legenda: Senioras e seniors duain pudair giudair lur pensiun cura ch'els vulan. Keystone

Quai èn las miras per ina nova refurma da rentas ch'il Cussegl federal ha preschentà mesemna. El ha concludì da sa concentrar sin la refurma da l'emprima pitga.

AVS survegn prioritad

AVS e prevenziun professiunala obligatorica duain vegnir refurmadas en projects separads e tenor in agen urari. Prioritad ha l'AVS. In emprim sboz duai ir en consultaziun la stad 2018. La fin dal 2018 vul il Cussegl federal pudair deliberar in messadi. La refurma da l'AVS duai entrar en vigur il 2021.

Ils 24 da settember 2017 han 52,7 pertschient da las votantas e dals votants detg na a la refurma da prevenziun per la vegliadetgna.

Emprimas reacziuns sin la refurma da rentas

La mira è la gista, ma la via vers quella è anc intscherta. Quai è la reacziun da la Partida socialdemocratica en connex cun la proposta per la refurma da rentas dal Cussegl federal. Per la Partida socialdemocratica èsi cler: Il nivel da rentas sto vegnir mantegnì, nagina vegliadetgna da pensiun sur 65 onns e nagin augment da la vegliadetgna da pensiun da las dunnas senza ina cumpensaziun substanziala. L'uniun tetgala dals sindicats travaille.suisse beneventa ch'il Cussegl federal vul emplenir svelt la fora da finanziaziun en l'AVS en vista ad adina dapli persunas che van en pensiun.

RR novitads 15:00