Siglir tar il cuntegn

Header

cuntegn

Pensiun per 5 onns Blocher survegn 1'125'000 francs

L'anteriur cusseglier federal Christoph Blocher duai survegnir posteriurmain ina pensiun en la dimensiun da 5 onns. Quai ha la regenza federala decidì oz.

Anteriurs cusseglier federals survegnan circa 220'000 francs ad onn sch'els n'han suenter lur demissiun nagina autra occupaziun lucrativa. Questa regla vala sche la persuna è stada almain quatter onns en uffizi. Tenor quest quint survegniss Christoph Blocher 1.1 milliuns francs.

L'anteriur cusseglier federal da la PPS aveva desistì l'onn 2007 da questa pensiun, cura ch'el n'era betg pli vegnì reelegì. Questa stad dentant ha el fatg valair in'indemnisaziun da 2,7 miliuns francs. El haja da bun questa summa e na veglia betg surlaschar quella al stadi, è stà sia argumentaziun.

Sclauder pajaments posteriurs

En l'avegnir vul il Cussegl federal sclauder la pussaivladad da pajar rentas posteriurmain. Il mument na datti dentant nagina basa legala clera per il cas ch'in anteriur cusseglier federal fa valair las pretensiun pir pli tard. I saja chaussa d'interpretaziun, uschia il Cussegl federal. Sia decisiun ha el prendì sin fundament da duas expertisas giuridicas ed ina posiziun da l'Uffizi federal per giustia.

La delegaziun da finanzas dal parlament federal aveva dal reminent cusseglià al Cussegl federal da betg pajar pir uss la pensiun a Christoph Blocher.

RTR novitads 16:00

Artitgels legids il pli savens