Siglir tar il cuntegn

Svizra PCD pretenda segunda votaziun

Suenter ch'il Cussegl federal ha confermà d'avair publitgà ina faussa cifra en connex cun l'iniziativa «Per la lètg e la famiglia – Na als dischavantatgs per pèrs maridads» pretenda la PCD che quella vegn repetida.

Placat da la campagna pro l'iniziativa "Per la lètg e la famiglia – Na als dischavantatgs per pèrs maridads"
Legenda: Eran las cifras la culpa? - Il favrer 2016 ha ina stretga maioritad da las votantas e dals votants ditg na a l'iniziativa da la pcd. Keystone

La Partida cristiandemocratica svizra (PCD) ha inoltrà tar plirs chantuns in plant cunter la votaziun federala davart l’iniziativa dal pievel «Per la lètg e la famiglia – Na als dischavantatgs per pèrs maridads». Uschia pretenda ella ina repetiziun da la votaziun.

La PCD giustifitgescha quai pass cun il fatg ch’il Departament federal da finanzas ed era il Cussegl federal hajan publitgà en il messadi sco era en il cudeschet da votaziun la cifra da 80’000 pèrs cun gudogn dubel possian profitar da l’iniziativa. Il venderdi aveva il Cussegl federal admess che questa cifra n’è betg correcta. I sajan en tut 454’000 pèrs.

La PCD è perquai persvasa che bleras votantas e blers votants avessan votà a favur da l’iniziativa sche la cifra correcta fiss stada enconuschenta. L’iniziativa da la PCD, davart la quala il pievel ha votà il favrer 2016 era vegnida acceptada dad ina clera maioritad dals chantuns. Tar las vuschs avevan dentant 50,8 pertschient da las persunas che han votà mess in na en l’urna.

RR actualitad 17:00