Siglir tar il cuntegn
cuntegn

Svizra PCD lantscha iniziativa per franar custs da sanadad

La Partida cristiandemocratica svizra PCD vul franar l’augment da premias da las cassas da malsauns. Ils delegads han deliberà l’iniziativa per pli bassas premias en il sectur da sanadad. L’atun cumenza la partida a rimnar suttascripziuns.

Medi che tegna en maun in stetoscop.
Legenda: Il sectur da la sanadad è malsaun: La PCD vul prender per maun il problem cun lantschar in'iniziativa. Keystone

Curt e concis

  • Ils delegads da la PCD han preschentà l'iniziativa «Per premias pli bassas – franar custs en il sectur da sanadad».
  • Per la partida èsi fitg impurtant che tuts abitants en Svizra han in bun ma era finanziabel provediment da sanadad.
  • La PCD pretenda ch'ils custs ston vegnir franads.

Plinavant han ils delegads decidì la parola «gea» tar la nova legislaziun davart ils gieus per daners. Cun Charles Juillard ha la PCD elegì in nov vicepresident da la Svizra romanda.

Gerard Pfister e Charles Juillard.
Legenda: Gerard Pfister, president da la PCD (sanester) ed il nov vicepresident Charles Juillard a chaschun a la radunanza da delegads. Keystone
Nus stuain impedir l'augment illimità e fatal da las premias.
Autur: Gerhard Pfisterpresident da la PCD

Ballantscha gulivada tranter premias e pajas

La partida è da l'avis ch'ins po spargnar ils custs en il sectur da sanadad da sis milliardas francs senza perdita da qualitad. Cun l’iniziativa «Per premias pli bassas – franar custs en il sectur da sanadad» vul la PCD pussibilitar a tuts abitants en Svizra in bun però er finanziabel provediment da sanadad. Perquai duain las premias be crescher uschè fitg sco l’economia e las pajas.

Evitar surpassaments da limita

Il text proponì da la partida incarica il parlament da relaschar leschas confurmas. Ultra da quai duai ina disposiziun transitorica impedir ch'i vegn duvrà memia bler temp. Exista dus onns suenter che l'iniziativa è vegnida acceptada anc nagina lescha u mesiras, va automatic la correctura da tariffas en vigur: La Confederaziun sto ensemen cun ils chantuns tscherner mesirar per ina reducziun dals custs per il proxim onn.

RR novitads 12:00