Siglir tar il cuntegn
Inhalt

Svizra Pazient duai esser en il focus e betg ils custs

La Federaziun dals ospitals svizzers H+ pretenda midadas tar la lescha da las assicuranzas da malsauns.

Logo da l'ospital Scuol.
Legenda: Il mument dumbra H+ 236 comembers, tranter quels era il center da sanadad Engiadina Bassa. Keystone

Ils ospitals e las clinicas sajan da gronda impurtanza per in bun provediment da la sanadad en Svizra. Las cundiziuns actualas en il sectur da las tariffas sco era la finanziaziun differenta tar las prestaziuns ambulantas e staziunaras engrevgeschian dentant in agir effizient. Da quell'opiniun è la Federaziun dals ospitals svizzers H+. A Berna ha ella preschentà il mardi sias propostas per midadas.

H+ pretenda per exempel che la lescha per l'assicuranza da malsauns vegnia adattada, uschia ch‘ils partenaris da tariffa na possian betg pli bloccar ina revisiun dal TARMED, la structura da tariffas per prestaziuns medicalas.

Nagina differenza tranter ambulant e staziunar

Ultra da quai na duai betg pli dar differenzas tar la finanziaziun da prestaziuns ambulantas e staziunaras. Oz èsi uschia, che las cassas da malsauns han da surpigliar tut ils custs dad ina mesira ambulanta. Sch‘il pazient sto dentant star en l'ospital surpiglia il chantun 55% dals custs. Ils chantuns hajan uschia tut interess da minimar las mesiras staziunaras – quai che na saja betg adina en l'interess dal pazient.

I saja perquai cuntraproductiv da concentrar tut las stentas sin la reducziun dals custs. La federaziun H+ è persvasa, ch‘i saja en futur era impurtant da metter dapli paisa sin la qualitad da la medischina e sin in augment da l‘effizienza tar ils ospitals e las clinicas.

Santésuisse sceptica

A moda sceptica reagescha l'organisaziun da las cassas da malsauns Santésuisse sin las propostas da H+. Santésuisse sustegna bain la pretensiun, ch’ils chantuns duain era sa participar als custs dals tractaments ambulants. Lez sajan er responsabels per la planisaziun dals ospitals e per l'admissiun dals medis. Ultra da quai hajan plirs chantuns introducì glistas che defineschian tgeninas operaziuns che stoppian vegnir fatgas ambulantamain.

Betg renunziar vul Santésuisse dentant sin l’instrument dal veto tar las negoziaziuns per in nov sistem da Tarmed. L’organisaziun da las cassas da malsauns tema, che tschels partenaris da tariffa pudessan uschiglio decider in sistem cun indemnisaziuns anc pli autas che oz. Quai fiss cunter la lescha ed augmentass anc pli fitg las premias per las cassas da malsauns.

RR novitads 12:00