Pervia da numerus projects da construcziun e da sanaziun èsi da quintar cun auters temps da partenza, viadis pli lungs e perfin cun interrupziuns da tscherts trajects, scrivan las Viafiers federalas svizras. Bajegià vegni sin dapli che 30 plazzals, quai davent ils 30 da zercladur enfin ils 26 d’avust. Durant quels dus mais lavurian da quai da 2'000 emploiads da las Viafiers federalas e d’interpresas spezialisadas sin ils plazzals.
Il pli grond sa chatta en Svizra franzosa, tranter Losanna e Puidoux, sin la lingia da viafier a Berna. Durant set emnas è quai tschancun serrà cumplettamain. Las Viafiers federalas renoveschan tut ils binaris e saneschan ils tunnels.
Tenor las Viafiers federalas han els decidì sapientivamain da far quellas lavurs durant las vacanzas da stad. Uschia sajan pli paucs pendularis pertutgads da las lavurs. E grazia a la pussaivladad da pudair serrar intgins tschancuns custian las lavurs da sanaziuns enfin 30% pli pauc.
RR novitads 17:00