Siglir tar il cuntegn
cuntegn

Svizra Passa 22 milliardas francs per perscrutaziun e svilup

La Svizra ha dà ora l’onn 2015 ina summa da record per perscrutaziun e svilup e tucca uschia tar ils leaders entaifer ils stadis da l’OECD. Principalmain èn interpresas e scolas autas stadas activas en quai sectur.

Ina part dal Cern a Genevra che mussa il svilup tecnic.
Legenda: Summa da record per perscrutaziun e svilup. Keystone

L'onn 2015 ha la Svizra dà ora passa 22 milliardas francs per perscrutaziun e svilup. Quai èn 10,5% dapli che tar l'ultima retschertga il 2012, sco quai che l'Uffizi federal da statistica ha communitgà.

Radund 125'000 persunas han lavurà en quai connex en Svizra. Las expensas per perscrutaziun e svilup han muntà a 3,4% dal product naziunal brut. Entaifer ils stadis da l’Organisaziun da cooperaziun e svilup economic en Europa (OECD) è la Svizra uschia sin plaz 4, suenter l'Israel, la Corea dal sid ed il Giapun.

Dapli plazzas da lavur

Cun 71% da tut las expensas han las interpresas dà ora ils pli bler per perscrutaziun e svilup en Svizra. Sin plaz 2 suondan las scolas autas cun 27%. L’augment da las expensas per perscrutaziun e svilup ha effectuà che dapli persunas èn vegnidas occupadas en quai sectur. Il 2015 hai uschia dà 7,9% plazzas dapli che l'onn 2012.

RR novitads 14:00