Siglir tar il cuntegn
cuntegn

Svizra Passa 20 onns en praschun e lura?

Marco Camenisch è probabel in dals pli renumads praschuniers en Svizra. Dapi 24 onns è el uss en praschun. La fin da l'onn duai el midar en ina praschun averta ed il 2018 vegnir relaschà en libertad. Co vegn dentant insatgi ch'è stà serrà en durant passa 20 onns preparà per la vita en libertad?

casas da peton, seiv, parschun
Legenda: Persunas ch'èn stadas en praschun durant plirs onns ston puspè vegnir preparadas per la societad. Keystone

Duas grondas portas grischas s'avran cun in sumsurar ed il praschunier dastga bandunar la praschun. Las portas sa serran puspè. Quai è il tipic maletg d'in praschunier che dastga bandunar la praschun suenter ch'el ha sesì giu ses chastì.

En Svizra na correspunda quest maletg però betg a la realitad. «La liberaziun da persunas ch'han vivì durant passa 20 onns en praschun na succeda betg dad in di sin l'auter», di Vera Camenisch manadra dal servetsch social da la praschun Realta. Er Marco Camenisch vegnia probabel ad avair fatg atras differentas fasas.

La liberaziun na succeda betg dad in di sin l'auter.
Autur: Vera Camenischmanadra dal servetsch social da la praschun Realta

La finamira principala saja adina ch'i na vegnia betg a novs delicts. In'autra finamira saja dentant era da cuntanscher ina resocialisaziun. «Ozendi vegn la resocialisaziun gia tematisada baud», declera Camenisch. I dettia dentant tuttina in tschert privel ch'ils arrestads n'èn en tscherts secturs betg sin il stan actual, uschia per exempel quai che pertutga la nova tecnologia.