Siglir tar il cuntegn
cuntegn

Svizra Passa 110’000 suttascripziuns per iniziativa da daners reals

L'Uniun per la modernisaziun monetara MoMo ha inoltrà il mardi a la Chanzlia federala l'uschenumnada iniziativa da daners reals, e quai cun passa 110’000 suttascripziuns. L'iniziativa pretenda che sulettamain la Banca naziunala svizra dastga crear daners electronics sper la munaida e bancnotas.

Munaida e bancnotas svizras.
Legenda: L'introducziun da daners reals fiss era internaziunalmain in novum. Keystone

La cumpart da daners reals cumpiglia oz mo 10% da tut ils daners ch’èn en circulaziun. 90% èn daners electronics, creads da bancas privatas entras dar credits. Malgrà che quels daners n’existan betg, augmentan els la quantitad da daners en circulaziun. Uschè spert ch’in credit vegn paja enavos, svaneschan quels daners electronics puspè.

Evitar scuflas finanzialas

Ils daners electronics na sajan dentant betg meds da pajament legals, mabain sulettamain in'empermischun da la banca da dar ad in client daners, sche e cura ch’el dovra quels.

Quest sistem vulan ils iniziants midar. Da la refurma da daners reals spetgan els che las bancas na pon betg pli stgaffir daners a moda excessiva. Uschia pudess ins evitar scuflas finanzialas.

Nagins dischavantatgs per clients da bancas

Tenor ils iniziants na vai betg per naziunalisar las bancas. Quellas na duain sulet betg esser ablas da stgaffir daners. Tras la stgaffiziun da daners electronics pudess la Banca naziunala pajar ora a la Confederaziun ed als chantuns ulteriuras 5 fin 10 milliardas francs.

Per ils clients da bancas “normals” na sa midass tenor ils iniziants betg massa. Lur daners vegnissan mo pli administrads ordaifer da la bilantscha da la banca. Uschia na pudessan las bancas betg pli emprestar quels daners per credits. E sch’il client veglia in tschains, lura pudess el metter ses daners sin in conto da spargn u d’investiziun. Quests daners pudess ina banca duvrar per credits.

RR novitads 11:30