La decisiun da Widmer-Schlumpf schluchia la politica svizra, ha declerà il president da la PPS, Toni Brunner. Ussa possia sia partida surpigliar dapli responsabladad. «Sch’ins vul prender resguard sin las elecziuns naziunalas dals 18 d’october, lura stuessan ins renconuscher il segund sez da la PPS», uschia Brunner. «Nus na pudain betg far dapli che porscher quest sez, che nus vulain era surpigliar responsabladad.» Ussa stoppian tschellas partidas decider.
Candidat sto sustegnair contracts bilaterals
E per las partidas burgaisas èsi cler. Tant per la Partida cristiandemocratica (PCD), la Partida dals verdliberals (PVL) sco er per la Partida liberaldemocratica (PLD) è il segund sez da la PPS legitim. La sanestra na snega betg la pretensiun da la PPS, vesa ils burgais però en l'obligaziun da nominar candidats che sustegnan ils contracts bilaterals.
Laud per Widmer-Schlumpf
Ed er ord vista dals commentaturs da la pressa svizra duai il sez che vegn liber ir a la partida populara. I vegn ussa però spetgà che quella nomineschia candidats che respectian la collegialitad en la regenza e che veglian collavurar constructiv. Dals commentaturs survegn Eveline Widmer-Schlumpf quasi senza excepziun laud per sia administraziun da l'uffizi però er per sia decisiun da sa retrair suenter las elecziuns.
RR novitads 06:00