Il minister da defensiun svizzer Guy Parmelin ha ordinà a ses collavuraturs da danovamain tschertgar tut las actas davart l'organisaziun da resistenza dispitaivla P-26.
Il cusseglier federal Guy Parmelin vul avair tut las actas davart l'organisaziun da resistenza dispitaivla P-26. Quai ha el confermà envers radio SRF. Tut las actas stoppian tant pli spert vegnir tramessas en l'archiv federal.
Segunda ordra
Gia l'atun passà aveva el gia laschà tschertgar questas actas. Fin ussa però senza success. La nova tschertga duai vegnir extendida. L'organisaziun era vegnida engaschada il 1979 sco sut-grupap dal servetsch da novitads e defensiun en Svizra.
La P-26 era ina gruppa da resistenza svizra durant la «guerra fraida» ch'ins vuleva activar, sche la Svizra fiss vegnida occupada da stadis communistics.
Radund 400 schuldads aveva l'armada recrutà e scolà – ed endrizzà e mantegnì deposits d'armas secrets.
Curt suenter la crudada dal mir da Berlina (1989) era la gruppa vegnida scuvrida en il rom da la «affera da fischas», e lura schliada per mancanza da la basa legala.
Ina cumissiun d'inquisiziun parlamentara aveva intercurì la causa en in raport. In raport supplementar è ussa svanì.
