Siglir tar il cuntegn

Svizra Parmelin vul nagina votaziun dal pievel

ll minister da sport Guy Parmelin è cunter ina votaziun dal pievel sur d’ina organisaziun da gieus olimpics d’enviern a Sion il 2026. Ina candidatura saja chaussa chantunala.

Guy Parmelin.
Legenda: Per Guy Parmelin è la candidatura ina chaussa chantunala e duai er restar quai. Keystone

Curt e concis

  • Il parlament decida pli probabel il mars sch'i duai dar ina votaziun dal pievel davart Sion 2026.
  • Cusseglier federal Guy Parmelin è cunter ina votaziun. L'argument principal è il temp. Il dossier sto vegnir inoltrà fin ils 11 da schaner 2019.

Cusseglier federal Guy Parmelin sa mussa en l'emissiun «Samstagsrundschau» da radio SRF fascinà dals gieus olimpics. Mintga di dettia el la damaun in sguard sin ils schabetgs a Pyeongchang. Ed il pli cuntent saja el natural sche noss sportists gudognan.

Areguard ina candidatura svizra en connex cun ils gieus olimpics 2026 commentescha Parmelin che la candidatura saja chaussa chantunala. Da far la candidatura tar ina chaussa naziunala saja ristgà.

Votaziun muntass fin per Sion 2026

Guy Parmelin tema che la votaziun da pievel muntass la fin da Sion 2026 ed è perquai cunter la votaziun. Cun l'argument principal: il temp. Il dossier to vegnir inoltrà enfin ils 11 da schaner 2019 al comité olimpic internaziunal. Quai na saja betg pussaivel sch'i la chaussa vegnia davent l'urna.

Planisà èsi ch'il parlament vegn a decider il mars, sche ils gieus olimpics a Sion van davant l'urna.

Custs: «chaussa da solidaritad»

Quai che pertutga ils custs spera il cusseglier federal da la Partida populara svizra dentant ch'ils auters chantuns sajan solidarics. El spera ch'ils chantuns betg ospitants mettian a disposiziun policists gratuitamain. Medem sco tar il campiunadi da ballape europeic il 2008.

Ils directurs da polizia chantunals avevan il november dentant decidì da pretender 600 francs per policist per di. Parmelin spera uss ch'ins midia questa decisiun tar la conferenza da las regenzas chantunalas.

RR novitads 15:00