Siglir tar il cuntegn

Header

cuntegn

Svizra Parlamentaris grischuns en bleras cumissiuns federalas

Ils biros dal Cussegl naziunal e dal Cussegl dals chantuns han fixà tge parlamentaris ch’èn represchentads en tge cumissiuns. La lavur da cumissiun vala sco fitg impurtanta, cunquai ch’ils parlamentaris pon prender influenza directa sin ils dossiers.

Ils commembers da las cumissiuns èn elegids mintgamai per 4 onns ed ils presidents mintgamai per 2 onns. Ils 7 grischuns èn represchentads total en 15 cumissiuns dal Cussegl naziunal e dal Cussegl dals chantuns.

Martin Schmid presidiescha la WAK

Il cusseglier dals chantuns Martin Schmid (PLD) è represchentà en 4 cumissiuns: Quella cun grond prestige è la cumissiun per economia e taxas dal cussegl dals chantuns (WAK). Da nov è Martin Schmid president da la WAK – enfin ussa era el vice-president. Plinavant resta Schmid commember da la cumissiun per ambient, planisaziun dal territori ed energia (UREK), da la cumissiun per dumondas giuridicas e da la cumissiun da grazia.

L’auter represchentant grischun en il cussegl dals chantuns – Stefan Engler (PCD) – sesa medemamain en 4 cumissiuns. Duas da quellas ensemen cun Martin Schmid, numnadamain en la cumissiun per economia e taxas (WAK) e la cumissiun per dumondas giuridicas. Plinavant resta Engler represchentà en la cumissiun per traffic e telecommunicaziun (KVF) ed en la cumissiun da las instituziuns politicas (SPK).

Martullo-Blocher direct en WAK

Ina pitschna surpraisa è che Magdalena Martullo-Blocher (PPS) survegn gist sco noviza en il cussegl naziunal in sez en la cumissiun per economia e taxas (WAK) – ina cumissiun ch’è colliada cun blera influenza e prestige. L’auter novizs a Berna – Duri Campell (PBD) – è represchentà en la cumissiun da las instituziuns politicas (SPK) ed en la cumissiun da gestiun dal cussegl naziunal (GPK).

Brand presidiescha la cumissiun da las instituziuns politicas

Enfin ussa vice-president da la cumissiun da las instituziuns politicas dal cussegl naziunal (SPK), po Heinz Brand (PPS) ussa presidiar quella. Plinavant è Brand represchentà en la cumissiun per segirtad sociala e sanadad (SGK).

Martin Candinas (PCD) po mantegnair ses sez en la cumissiun per traffic e telecommunicaziun (KVF) e survegn vitiers da nov invista en la cumissiun da gestiun dal cussegl naziunal (GPK). Naginas midadas datti per Silva Semadeni (PS) ch’è lavura vinavant en la cumissiun per ambient, planisaziun dal territori ed energia (UREK).

RR novitads 16:00

Artitgels legids il pli savens