La PLD ha preschentà en tut trais candidats per il Cussegl federal. Cun Isabelle Moret era sulet ina dunna tranter ils candidats.
Dunna u Italianità
Per Silva Semadeni (PS) era la tscherna da principi in dilemma. Uschia avess Semadeni giu gugent ina dunna en la regenza ma era l’Italiantà è datiers a Semadeni. La finala ha l’identitad taliana dominà tar Semadeni.
Elecziun cunter la partida
Duri Campell (PBD) ha la finala medemamain elegì Ignazio Cassis en il Cussegl federal, quai cunter la decisiun da sia partida. Uschia aveva la PBD laschà savair da sustegnair Pierre Maudet surtut pervia da sia experientscha en l'executiva dal chantun Genevra.
Per il Grischun ina buna elecziun
Il collega da partida Ignazio Cassis saja in bun tip, ha ditg il cusseglier dals chantuns Martin Schmid. Cassis saja surtut enconuschent sco schef da fracziun da la partida liberala e per il chantun Grischun saja sia tscherna ina buna elecziun, ha ditg Schmid.
Cassis era il favurit
Per la fracziun da la PCD era Ignazio Cassis da l'entschatta anora il favurit ed uschia saja l'elecziun era la consequenza logica. E sco represchentant dal Tessin haja il nov elegì cusseglier federal era chapientscha per ils desideris dal Grischun, uschia il cusseglier dals chantuns Stefan Engler.
Clera spetgas en Cassis
La fracziun da la PPS aveva gia avant las elecziuns communitgà da vulair sustegnair Ignazio Cassis ed uschia era el il favurit per la pli ferma fracziun en il parlament. Uss dettia quai però era cleras spetgas envers Cassis, ha accentuà Magdalena Martullo-Blocher.
RR actualitad 12:00
