Siglir tar il cuntegn

Svizra Parlamentaris ennevads

La sala dal Cussegl naziunal era questa bun'ura quasi vida, cura che la sessiun ha cumenzà. Las cusseglieras naziunalas ed ils cussegliers naziunals han gì fadia da chattar la via tras la naiv enfin en Chasa federala. L'odissea dals parlamentaris è adina puspè stada tema en la debatta.

La naiv ha mess sin il chau la sessiun questa bun'ura. La sessiun ha cumenzà punctualmain a las 8:00, però blers cussegliers naziunals mancavan anc perquai che la naiv ha chaschunà caos sin las vias e las rodaglias. Tractada è vegnida l'iniziativa da velo, dentant na saja oz betg la meglra aura per quel, han divers cussegliers naziunals constatà.

La fin finala era il Cussegl naziunal cumplet. Las decisiuns han pudì vegnir fatgas e quai cun in per sgnoccas e risadas dapli ch'uschiglio.

Iniziativa da velo

La Confederaziun duai promover il traffic da velo en Svizra - però senza l'iniziativa da velo. Suenter il Cussegl dals chantuns ha oz era il Cussegl naziunal approvà ina cuntraproposta a l'iniziativa da velo.

Quella vuleva obligar la Confederaziun da sustegnair finanzialmain novs projects per vias da velos en Svizra. Per la maioritad dal Cussegl naziunal gieva quella dentant memia lunsch.

Ch'ir cun velo saja ina buna chaussa, n'ha nagin mess en dumonda. I na possia dentant betg esser che la Confederaziun intervegnia en las cumpetenzas dals chantuns e da las vischnancas. Gist quai problem schlia la cuntraproposta, hai gì num. L’unica differenza a l'iniziativa da Pro Velo è che la cuntraproposta di che la Confederaziun possia, ma na stoppia betg coordinar la promoziun dal velo en Svizra.

Tant il Cussegl federal sco er il Parlament federal proponan perquai a las votantas ed als votants da refusar l'iniziativa ed enstagl d'acceptar la cuntraproposta.

RR actualitad 12:00