Siglir tar il cuntegn

Header

audio
Nova emprova da regular lufs: las reacziuns
Or da Actualitad dals 19.01.2022.
laschar ir. Durada: 4 minutas 34 Secundas.
cuntegn

Parlament federal Nova emprova da regular il luf – emprimas reacziuns èn positivas

La cumissiun d’ambient dal Cussegl naziunal ha dà glisch verda ad ina iniziativa parlamentara da la cumissiun correspundenta dal Cussegl dals chantuns. Cun quai duai dar ina nova emprova da regular il luf tras la lescha da chatscha. Las emprimas reacziuns èn da tut las varts positivas.

Il luf duess pudair vegnir sajettà a moda preventiva – per exempel sche l'agricultura vegn periclitada. Uschia duess la derasaziun dal luf vegnir controllada meglier, argumenteschan las duas cumissiuns d’ambient la decisiun da far in’ulteriura emprova per in midament da la lescha da chatscha. A la fin da l’onn 2020 ha in'emprova da reveder la lescha fatg naufragi a l’urna.

En in proxim pass sto la cumissiun d’ambient dal Cussegl dals chantuns elavurar ina proposta concreta. Il Cussegl federal prenda lura posiziun sin quella proposta. Il pli baud discutescha il Cussegl dals chantuns en la sessiun d’atun davart la proposta per ils midament en la lescha da chatscha.

Sustegn da SAB ed organisaziuns d'ambient

La gruppa svizra per las regiuns da muntogna (SAB) beneventa la decisiun. Tenor ella saja uss impurtant dad agir spert. La derasaziun dal luf saja gia problematica per las regiuns da muntogna. Per la SAB è perquai ina revisiun da la lescha da chatscha la gista opziun.

Era las organisaziuns da la natira e da l'ambient sustegnan in'ulteriura revisiun da la lescha da chatscha, scriva la Pro Natura en ina communicaziun. En in hearing tar la cumissiun d'ambient sajan ins sa cunvegnì da collavurar vid in cumpromiss, ensemen cun tut las gruppas d'interess.

audio
Per tadlar: curt e cumpact
ord RTR Audio dals 18.01.2022.
laschar ir. Durada: 1 minuta 1 Secunda.

RTR Actualitad 17:00

Artitgels legids il pli savens