Parc natiral regiunal empè da parc naziunal

En las vischnancas enturn il San Bernardino duai dar in parc natiral regiunal. Quai quasi per remplazzar il Parc Adula ch’è vegnì refusà la fin da november 2016.

In parc natiral duai attrair turists e dar ina perspectiva a la populaziun.

Legenda da maletgs: In parc natiral duai attrair turists e dar ina perspectiva a la populaziun. Keystone

Ils presidents communals dal Grischun e dal Tessin en il nord ed en il sid dal San Bernardino (Spleia, Valragn, Mesocco, Soazza, Rossa, Calanca e Buseno) vulan in parc natiral regiunal.

Parc regiunal pli pitschen

Las vischnancas enturn il San Bernardino che han detg «gea» al Parc Adula vulan in project redimensiunà. Tar quai han ils represchentants da las vischnancas ditg «gea». Els vulan trair a niz quai ch’è vegnì elavurà en connex cun il Parc Adula. Mez schaner duain esser enconuschents ils custs d'in studi da realisabladad. Gia il 2020 duai il parc natiral regiunal esser realitad.

A la sesida cun las vischnancas ha il chantun dentant pretendì ch’era las vischnancas al San Bernardino ch’han refusà il Parc Adula sajan da la partida, per exempel Nufenen. Las vischnancas ch’avevan detg gea al Parc Adula èn pauc intgantadas da quai. Ellas vulan far vinavant e na dovrian nagins franaders.

RR actualitad 11:00