Siglir tar il cuntegn

Svizra «Panama Papers»: Levrat crititgescha Maurer

Il president da la PS, Christian Levrat, crititgescha Ueli Maurer davart ses commentaris tar fatschentas da persunas ritgas en oasas fiscalas, uschenumnadas firmas d'offshore. Ch’il minister da finanzas defendia las praticas per zuppar daners saja inacceptabel ed «impertinent», ha ditg Levrat.

Christian Levrat
Legenda: Nagina chapientscha per ils commentaris da Maurer ha Christian Levrat. Keystone

Quai ha ditg Christian Levrat a la gasetta «Blick». Ueli Maurer aveva ditg il venderdi envers la gasetta che fatschentas en oasas fiscalas sajan legalas. Quellas sajan necessarias.

Opiniuns divergentas

Ord la vista da Levrat vegnia quai en 90% dals cas fatg diever illegal da las activitads d’offshore, las qualas èn atgnamain legalas. Envers il «Blick» ha ditg Levrat ch’i saja ina garmaschia e nuschaivel per la Svizra da bagatellisar il fraud da taglia via contos d’offshore.

Il venderdi – suenter la scuverta dals uschenumnads «Panama Papers» - aveva Ueli Maurer defendì la pratica da bainstants d’investir lur daners en fatschentas d’offshore. En in’intervista cun il «Blick» aveva Maurer refusà d’introducir novas leschas - i dettia «definitivamain» avunda regulaziuns.

RR novitads 11:00