Siglir tar il cuntegn

Header

cuntegn

Svizra Pajas da managers creschan per 7%, quellas d'emploiads per 0,7%

La forsch tranter las pajas da schefs e dad emploiads crescha vinavant.

En media han ils CEO's dals 40 pli gronds concerns svizzers survegnì 7% dapli paja l'onn passà. Ils emploiads perencunter be 0,7% dapli. Quai resulta dad in studi dal sindicat UNIA.

Tar 26 dals 40 concerns ch'èn vegnids intercurrids èn las pajais dals schefs creschidas, quai per 10 miliuns sin 188 miliuns francs. Il schef cun la pli auta paja resta Sergio Ermotti, il CEO da la banca UBS, quai cun 13,7 milliuns francs.

Crititga per ils schefs da Schindler e Sulzer

Il sindicat ha constatà tar singuls cas grondas cuntradicziuns tranter salaris pajads, success d'interpresa betg ademplì e mesiras sin donn e cust dal persunal. En quest connex vegnan las firmas Schindler e Sulzer numnadas.

Schindler ha l'onn 2016 bajegià giu 120 plazzas da lavur e Sulzer ha annunzià da vulair en il decurs dal 2017 bajegiar giu 90 plazzas da lavur. Il schef da Schindler Silvio Napoli e schef da Sulzer Gregoire Paux-Guillaume han dentant tuttina per persuna cassà 3,5 milliuns francs.

Industria da vivondas ha las pli grondas differenzas

En l'industria da vivondas datti la pli gronda forsch tranter pajas da schefs e d'emploiads. Las pajas stattan en ina relaziun dad 1:237. L'auzament da la paja dal schef da Nestlé, Paul Bulcke per bunamain 24%, sin 11,21 milliuns francs ha principalmain contribuì a quai.

En l'industria da chemia e farma è la differenza en media tar 1: 217. Roche è là la fatschenta cun la pli gronda differneza, cun ina relaziun dad 1:266. Cun quai ha la fatschenta la pli auta differenza da pajas da tuttas fatschentas intercurridas insumma. Il schef da Roche, Severin Schmwan ha gudagnà il 2016 11,64 milliuns francs.

Gist suenter l'industria da chemia e farma giascha il sectur da bancas ed assicuranzas cun ina media dad 1:200. Là è l'UBS plazzada il pli aut cun ina forsch da 1:264. En las branschas da metal, da mschinas e d'uras sco era en la branscha da construcziun giascha la media tar 1:134.

Il sindicat constattescha che la forsch da las pajas è s'averta anc pli fitg en las bleras branschas, dapi ses rapport dal 2012.

RR novitads 12:00

Artitgels legids il pli savens